ఆంధ్రప్రదేశ్ మంత్రి నారా లోకేశ్ గురువారం విశాఖపట్నంలో ఒకేరోజు ఏకంగా ఐదు ఐటీ కంపెనీలకు శంకుస్థాపన (భూమిపూజ) చేశారు. సీఐఐ పార్ట్నర్షిప్ సమ్మిట్కు ఒక రోజు ముందు జరిగిన ఈ కార్యక్రమాల్లో పారిశ్రామికవేత్తలు, ప్రజలు ఉత్సాహంగా పాల్గొన్నారు. రూ.3,800 కోట్లతో ఏర్పాటు చేసే ఈ భారీ ప్రాజెక్టుల ద్వారా సుమారు 30 వేల మందికి ప్రత్యక్షంగా ఉద్యోగావకాశాలు లభించనున్నాయని అంచనా. భారత్లో అతిపెద్ద విదేశీ ప్రత్యక్ష పెట్టుబడి అయిన గూగుల్ ఏఐ హబ్ ప్రకటన తర్వాత నగరానికి ఐటీ కంపెనీలు క్యూ కట్టాయి.
మంత్రి లోకేశ్ భూమిపూజ చేసిన కంపెనీలలో ప్రముఖంగా సైల్స్ సాఫ్ట్వేర్ సొల్యూషన్స్, ఐస్పేస్ సాఫ్ట్వేర్, టెక్ తమ్మిన, ఫీనోమ్ పీపుల్స్ ప్రైవేట్ లిమిటెడ్, మరియు కపిల్ గ్రూప్ అనుబంధ సంస్థ ఆధ్వర్యంలో వరల్డ్ ట్రేడ్ సెంటర్ ఉన్నాయి. ఈ కంపెనీలలో సెయిల్స్ సాఫ్ట్వేర్ సొల్యూషన్స్ రూ.21 కోట్లతో ఏఐ ఎక్సలెన్స్ సెంటర్ను ఏర్పాటు చేయనుంది. రహేజా సంస్థ రూ.2,172 కోట్లతో ఐటీ స్పేస్, కమర్షియల్ స్పేస్ మిక్స్డ్ డెవలప్మెంట్కు శంకుస్థాపన చేసింది, దీని ద్వారా 15 వేల మందికి ఉద్యోగాలు లభించనున్నాయి.
మరో కీలక ప్రాజెక్ట్ అయిన వరల్డ్ ట్రేడ్ సెంటర్ నిర్మాణానికి కపిల్ గ్రూప్ అనుబంధ సంస్థ రూ.1,250 కోట్లు పెట్టుబడి పెడుతోంది, ఇది కూడా 15 వేల మందికి ఉద్యోగాలు కల్పించనుంది. ఫీనోమ్ పీపుల్స్ ప్రైవేట్ లిమిటెడ్ రూ.207.5 కోట్లతో గ్లోబల్ డెవలప్మెంట్ సెంటర్, ఐస్పేస్ సాఫ్ట్వేర్ రూ.119.18 కోట్లతో తమ యూనిట్ను విశాఖలో ఏర్పాటు చేస్తున్నాయి. ఈ భారీ పెట్టుబడులు విశాఖపట్నంను ఐటీ హబ్గా మార్చే దిశగా వేగంగా అడుగులు పడుతున్నాయని స్పష్టం చేస్తున్నాయి.
