తెలంగాణ ఉప ముఖ్యమంత్రి మల్లు భట్టి విక్రమార్క ఆంధ్రప్రదేశ్ ముఖ్యమంత్రి నారా చంద్రబాబు నాయుడును మర్యాదపూర్వకంగా కలిశారు. అమరావతిలోని ఉండవల్లి నివాసంలో జరిగిన ఈ భేటీలో మంత్రి దుద్దిళ్ల శ్రీధర్ బాబు కూడా పాల్గొన్నారు. తన కుమారుడు సూర్య విక్రమాదిత్య వివాహ ఆహ్వాన పత్రికను చంద్రబాబుకు అందజేసిన భట్టి, మార్చి 5వ తేదీన హైదరాబాద్లో జరగనున్న వేడుకకు తరలివచ్చి నూతన వధూవరులను ఆశీర్వదించాలని కోరారు.
ఈ పర్యటనలో భాగంగా భట్టి విక్రమార్క ఏపీ అసెంబ్లీ స్పీకర్ చింతకాయల అయ్యన్నపాత్రుడిని కూడా కలిసి వివాహానికి ఆహ్వానించారు. అంతకుముందు విజయవాడ ఇంద్రకీలాద్రిపై కొలువై ఉన్న కనకదుర్గమ్మను దర్శించుకుని ప్రత్యేక పూజలు నిర్వహించారు. రెండు తెలుగు రాష్ట్రాల ప్రజలు ఆయురారోగ్యాలతో, శాంతి సౌభాగ్యాలతో వర్ధిల్లాలని అమ్మవారిని ప్రార్థించినట్లు ఆయన మీడియాకు తెలిపారు.
కుమారుడి వివాహ వేడుక కోసం భట్టి విక్రమార్క దేశవ్యాప్తంగా ప్రముఖులను ఆహ్వానిస్తున్నారు. ఇప్పటికే ఢిల్లీలో సోనియా గాంధీ, రాహుల్ గాంధీ, ప్రియాంక గాంధీ వంటి అగ్రనేతలను, అలాగే కర్ణాటక సీఎం సిద్ధరామయ్య, డిప్యూటీ సీఎం డీకే శివకుమార్లను కలిసి స్వయంగా ఆహ్వాన పత్రికలు అందించారు. రాజకీయాలకు అతీతంగా ఇరు రాష్ట్రాల ముఖ్యనేతలను ఆహ్వానిస్తుండటంతో ఈ వివాహ వేడుక ఒక వేదికగా మారనుంది.
