ఢిల్లీ లిక్కర్ స్కామ్ కేసును రౌస్ అవెన్యూ కోర్టు కొట్టివేయడం బీఆర్ఎస్ పార్టీలో సంతోషాన్ని నింపాల్సింది పోయి, అన్నాచెల్లెళ్ల మధ్య రాజకీయ చిచ్చుకు దారి తీసింది. ఈ కేసు కేవలం రాజకీయ కక్ష సాధింపు అని పేర్కొంటూనే, దీనివల్ల పార్టీ ఎన్నికల్లో భారీగా నష్టపోయిందని కేటీఆర్ చేసిన ట్వీట్ వివాదానికి కేంద్రబిందువైంది. ఈ స్కామ్ అనే నెరేటివ్ వల్లే పార్టీ రాజకీయంగా బలి అయిందని ఆయన చేసిన విశ్లేషణ, పరోక్షంగా కవిత వైపే వేలు చూపిస్తోందన్న అర్థాన్ని స్ఫురింపజేయడంతో పార్టీలో గందరగోళం మొదలైంది.
కేటీఆర్ వ్యాఖ్యలపై ఎమ్మెల్సీ కవిత తీవ్రంగా స్పందించారు. పార్టీ ఓటమిని తన ఖాతాలో వేయడంపై ఆమె అసహనం వ్యక్తం చేస్తూ, తనపై నమోదైన కేసు పార్టీ కోసమే కానీ వ్యక్తిగతమైనది కాదని స్పష్టం చేశారు. తాను జైలులో ఉన్న సమయంలో కనీసం ఒక ప్రెస్ మీట్ పెట్టి కూడా పార్టీ అండగా నిలవలేదని ఆమె ఆవేదన వ్యక్తం చేశారు. పార్టీ ప్రయోజనాల కోసం తాను ఇబ్బందులు పడితే, ఇప్పుడు ఓటమికి తననే బాధ్యురాలిని చేయడం అన్యాయమని ఆమె నేరుగా కేసీఆర్, కేటీఆర్ వైఖరిని తప్పుబట్టారు.
ఈ పరిణామాలు బీఆర్ఎస్ క్యాడర్లో తీవ్ర అయోమయాన్ని సృష్టిస్తున్నాయి. ఒకవైపు న్యాయస్థానంలో విజయం లభించిందన్న ఆనందం ఉన్నా, మరోవైపు కుటుంబ సభ్యుల మధ్యే ఓటమి బాధ్యతపై తలెత్తిన వాగ్వాదం చర్చనీయాంశంగా మారింది. కవిత సొంతంగా పార్టీ పెట్టబోతున్నారనే ప్రచారం జరుగుతున్న తరుణంలో, కేటీఆర్ వైఖరి మరియు కవిత ఘాటు స్పందన పార్టీ భవిష్యత్తుపై కొత్త ప్రశ్నలను లేవనెత్తుతున్నాయి.
