తెలంగాణ ప్రభుత్వం సామాజిక భద్రతకు పెద్దపీట వేస్తూ మరో రెండు చారిత్రాత్మక పథకాలకు శ్రీకారం చుట్టింది. వృద్ధులు, దివ్యాంగులు మరియు చిన్నారుల సంక్షేమం కోసం రూపొందించిన ‘ప్రణామం’ మరియు ‘బాల భరోసా’ పథకాలను ఈ నెల 12న ముఖ్యమంత్రి రేవంత్ రెడ్డి లాంఛనంగా ప్రారంభించనున్నారు. దివ్యాంగుల సహకార సంస్థ చరిత్రలో ఎన్నడూ లేని విధంగా భారీ నిధులను కేటాయించి, వారిని సామాజికంగా, ఆర్థికంగా బలోపేతం చేయడమే లక్ష్యంగా ప్రభుత్వం ఈ నిర్ణయం తీసుకుంది.
‘బాల భరోసా’ పథకం ద్వారా ఐదేళ్ల లోపు చిన్నారుల్లో ఉండే శారీరక లేదా మానసిక వైకల్యాలను ప్రాథమిక దశలోనే గుర్తించి, తగిన చికిత్స అందించడం ద్వారా వైకల్య రహిత తెలంగాణను నిర్మించాలని ప్రభుత్వం ఆశిస్తోంది. మరోవైపు, వృద్ధుల కోసం ‘ప్రణామం’ పథకం కింద రాష్ట్రవ్యాప్తంగా 37 మల్టీ సర్వీస్ డే కేర్ సెంటర్లను ఏర్పాటు చేస్తున్నారు. వృద్ధాప్యంలో ఒంటరితనంతో బాధపడేవారికి మానసిక ఉల్లాసం, సరైన సంరక్షణ అందించడమే ఈ కేంద్రాల ప్రధాన ఉద్దేశం.
దివ్యాంగుల అభ్యున్నతి కోసం ప్రభుత్వం సుమారు రూ. 50 కోట్ల భారీ నిధిని కేటాయించింది. ఇందులో భాగంగా రూ. 43.22 కోట్ల విలువైన అత్యాధునిక సహాయక పరికరాలను సుమారు 7 వేల మంది లబ్ధిదారులకు పంపిణీ చేయనున్నారు. ఈ జాబితాలో రెట్రోఫిట్టెడ్ మోటరైజ్డ్ వాహనాలు, బ్యాటరీ ట్రై సైకిళ్లు, వీల్ చైర్లతో పాటు విద్యా, ఉపాధి కోసం ల్యాప్టాప్లు, స్మార్ట్ ఫోన్లు మరియు వినికిడి యంత్రాలు ఉన్నాయి. ప్రభుత్వ తాజా నిర్ణయాల పట్ల సర్వత్రా హర్షం వ్యక్తమవుతోంది.
