అమరావతి రాజధాని నిర్మాణం కోసం తమ భూములను ప్రభుత్వానికి అప్పగించిన రైతులకు లింక్ డాక్యుమెంట్లు (Link Documents) అడగకుండానే రుణాలు ఇచ్చేందుకు బ్యాంకులు అంగీకరించినట్లు కేంద్ర మంత్రి పెమ్మసాని చంద్రశేఖర్ వెల్లడించారు. సాధారణంగా బ్యాంకులు స్థిరాస్తిపై రుణం ఇచ్చేటప్పుడు గత 30 ఏళ్ల లింక్ డాక్యుమెంట్లను అడుగుతుంటాయి. అయితే, రాజధాని రైతుల విషయంలో ఈ నిబంధనను సడలించి, కేవలం సీఆర్డీఏ (CRDA) జారీ చేసిన డాక్యుమెంట్ల ఆధారంగానే లోన్లు మంజూరు చేసేందుకు బ్యాంకర్లు సానుకూలంగా స్పందించారు.
రాజధాని రైతుల సమస్యల పరిష్కారం కోసం ఏపీ ప్రభుత్వం ఏర్పాటు చేసిన త్రిసభ్య కమిటీ శనివారం సీఆర్డీఏ కార్యాలయంలో భేటీ అయింది. ఈ సమావేశం అనంతరం మంత్రి పెమ్మసాని మాట్లాడుతూ.. జరీబు భూములకు సంబంధించిన సర్వే పూర్తయిందని, నివేదిక ఆధారంగా ఆ రైతులకు త్వరలోనే న్యాయం చేస్తామని హామీ ఇచ్చారు. అలాగే, రాజధాని నిర్మాణ పనుల ద్వారా సుమారు పది వేల మంది స్థానికులకు ఉపాధి కల్పించనున్నట్లు ఆయన పేర్కొన్నారు. అసైన్డ్ మరియు లంక భూముల సమస్యలపై కూడా కమిటీ సానుకూల నిర్ణయాలు తీసుకోబోతోందని వెల్లడించారు.
కౌలు రైతుల సంక్షేమంపై కూడా మంత్రి కీలక వ్యాఖ్యలు చేశారు. ప్రభుత్వ రంగ బ్యాంకులతో పాటు ప్రైవేట్ బ్యాంకులు కూడా కౌలు రైతులకు రుణాలు అందించాలని ఆయన సూచించారు. మరోవైపు, శంకర్ విలాస్ ఆర్ఓబీ (ROB) నిర్మాణం కోసం భూసేకరణ పనులను వేగవంతం చేయాలని అధికారులను ఆదేశించారు. అయితే, వ్యాపారులు కోరుతున్న ఐకానిక్ వంతెన నిర్మాణం ప్రస్తుత పరిస్థితుల్లో సాధ్యపడకపోవచ్చని, దానివల్ల వ్యాపారులే మరింత నష్టపోయే అవకాశం ఉందని మంత్రి తన అభిప్రాయాన్ని వ్యక్తం చేశారు.
