పంజాబ్ రాష్ట్రానికి చెందిన రిటైర్డ్ ఇన్స్పెక్టర్ జనరల్ ఆఫ్ పోలీస్ (ఐజీ) అమర్ సింగ్ చాహల్ భారీ సైబర్ మోసానికి గురై ప్రాణాలు తీసుకున్నారు. ఆన్లైన్ స్క్యామ్లో సుమారు ₹8.10 కోట్లు నష్టపోవడంతో తీవ్ర మనస్తాపానికి గురైన ఆయన, సోమవారం పాటియాలాలోని తన నివాసంలో సెక్యూరిటీ గార్డు రివాల్వర్తో కాల్చుకున్నారు. వెంటనే ఆయనను ఆసుపత్రికి తరలించినప్పటికీ, చికిత్స పొందుతూ ఆయన కన్నుమూశారు.
పోలీసులు ఘటనా స్థలం నుండి సుమారు 12 నుంచి 16 పేజీల సూసైడ్ నోట్ను స్వాధీనం చేసుకున్నారు. పంజాబ్ డీజీపీ గౌరవ్ యాదవ్ను ఉద్దేశించి రాసిన ఈ లేఖలో, తాను సైబర్ నేరగాళ్ల చేతిలో ఎలా మోసపోయారో మరియు దానివల్ల తలెత్తిన ఆర్థిక ఇబ్బందులను ఆయన వివరించారు. గత అక్టోబర్లో ఒక మోసపూరిత కంపెనీలో పెట్టుబడులు పెట్టడం ప్రారంభించిన ఆయన, మొదట తన సొంత డబ్బు ₹1 కోటి పెట్టినట్లు, ఆ తర్వాత బంధువులు, స్నేహితుల వద్ద అప్పులు చేసి మిగిలిన మొత్తాన్ని చెల్లించినట్లు సమాచారం.
అమర్ సింగ్ చాహల్ గతంలో వివాదాస్పద బెహబల్ కలాన్, కోట్కపురా కాల్పుల కేసులో నిందితుడిగా కూడా ఉన్నారు. ఉన్నత పోలీస్ హోదాలో పనిచేసిన అధికారి సైతం సైబర్ నేరగాళ్ల బారిన పడటం పట్ల సర్వత్రా ఆందోళన వ్యక్తమవుతోంది. ఈ ఘటనపై కేసు నమోదు చేసిన పోలీసులు, ఆయన పెట్టుబడులు పెట్టిన కంపెనీ వివరాలు మరియు ఆ నిధులు ఎక్కడికి మళ్లాయనే అంశాలపై లోతైన దర్యాప్తు జరుపుతున్నారు.
