ప్రముఖ పైరసీ వెబ్సైట్ ‘ఐబొమ్మ’ నిర్వాహకుడు ఇమంది రవికి నాంపల్లి కోర్టులో మరో ఎదురుదెబ్బ తగిలింది. తెలుగు రాష్ట్రాల్లో సంచలనం సృష్టించిన ఈ పైరసీ కేసులో అరెస్ట్ అయిన రవిని ఐదు రోజుల పాటు పోలీస్ కస్టడీకి అప్పగిస్తూ నాంపల్లి కోర్టు ఉత్తర్వులు జారీ చేసింది. ఈ కేసులో మరిన్ని వివరాలు రాబట్టేందుకు రవిని వారం రోజుల పాటు కస్టడీకి ఇవ్వాలని హైదరాబాద్ సైబర్ క్రైమ్ పోలీసులు కోర్టులో పిటిషన్ దాఖలు చేయగా, న్యాయమూర్తి ఇరుపక్షాల వాదనలు విన్న తర్వాత ఐదు రోజుల కస్టడీకి అనుమతించారు. దీంతో పోలీసులు రవిని కస్టడీలోకి తీసుకుని విచారణను కొనసాగించనున్నారు.
కొత్త సినిమాలు, ఓటీటీ కంటెంట్ను పైరసీ చేస్తూ చిత్ర పరిశ్రమకు తీవ్ర నష్టం కలిగిస్తున్నాడన్న ఆరోపణలతో ఇమంది రవిని గత శనివారం కూకట్పల్లిలో సైబర్ క్రైమ్ పోలీసులు అరెస్ట్ చేశారు. ఇమంది రవి ఏడేళ్లుగా ఐ బొమ్మతో పాటు బప్పం, ఐ విన్, ఐ రాధ టీవీ వంటి పేర్లతో పలు పైరసీ వెబ్సైట్లను నడుపుతున్నట్లు పోలీసులు గుర్తించారు. దీంతో అతడు ఈ పైరసీ రాకెట్లో కీలక సూత్రధారిగా వ్యవహరించినట్లు తేలింది.
రవి నివసిస్తున్న అపార్ట్మెంట్లో పోలీసులు జరిపిన సోదాల్లో రూ.3 కోట్ల నగదు, వందల సంఖ్యలో హార్డ్ డిస్క్లు, కంప్యూటర్లు, సెల్ఫోన్లు స్వాధీనం చేసుకున్నారు. అనంతరం అతడిని బషీర్బాగ్లోని సీసీఎస్కు తరలించి విచారించారు. తాజాగా కోర్టు కస్టడీకి అనుమతించడంతో, ఈ పైరసీ రాకెట్కు సంబంధించిన మరింత సమాచారాన్ని, ఇతర అనుబంధ వ్యక్తుల వివరాలను పోలీసులు రాబట్టే అవకాశం ఉంది.
