తెలంగాణ శాసనసభ బడ్జెట్ సమావేశాల్లో అధికార కాంగ్రెస్, ప్రతిపక్ష బీఆర్ఎస్ మధ్య పోరు ఏకపక్షంగా మారుతోంది. ప్రతిపక్ష నేత కల్వకుంట్ల చంద్రశేఖర్ రావు సభకు హాజరుకాకపోవడం గులాబీ దళానికి పెద్ద మైనస్గా మారింది. కేసీఆర్ లేని లోటును ముఖ్యమంత్రి రేవంత్ రెడ్డి తనకు అనుకూలంగా మార్చుకుంటూ, బీఆర్ఎస్ విమర్శలపై ఎదురుదాడికి దిగుతున్నారు. సభలో చర్చను తన నియంత్రణలోకి తెచ్చుకుంటూ రేవంత్ ప్రదర్శిస్తున్న వాగ్ధాటితో ప్రతిపక్షం ఉక్కిరిబిక్కిరి అవుతోంది.
బీఆర్ఎస్ తరపున కేటీఆర్, హరీష్ రావు గళం విప్పుతున్నప్పటికీ, కేసీఆర్ మార్క్ వ్యూహచతురత లోపిస్తోందని రాజకీయ విశ్లేషకులు అభిప్రాయపడుతున్నారు. నిరుద్యోగ భృతి, ఆరు గ్యారెంటీలు వంటి అంశాలపై కేటీఆర్ చేస్తున్న విమర్శలను రేవంత్ రెడ్డి చాకచక్యంగా తిప్పికొడుతున్నారు. గత ప్రభుత్వ వైఫల్యాలను సాక్ష్యాధారాలతో సహా బయటపెడుతుండటంతో, చర్చ బీఆర్ఎస్ అనుకూలంగా సాగాల్సింది పోయి తిరిగి వారి పాత పాలనపై విమర్శలకే పరిమితమవుతోంది. ఇది ఆ పార్టీ క్యాడర్లో కొంత ఆందోళన కలిగిస్తోంది.
కేసీఆర్ సభకు రాకపోవడాన్ని కాంగ్రెస్ ఒక బలమైన రాజకీయ అస్త్రంగా వాడుకుంటోంది. ప్రజలు ఎన్నుకున్నా బాధ్యతగా సభకు రావడం లేదంటూ రేవంత్ రెడ్డి చేస్తున్న వ్యాఖ్యలు ప్రజల్లోకి బలంగా వెళ్తున్నాయి. రేవంత్ వంటి దూకుడున్న నేతను ఢీకొనాలన్నా, సభలో చర్చను తమ అజెండా వైపు తిప్పుకోవాలన్నా కేసీఆర్ అనుభవం పార్టీకి అత్యవసరమని స్పష్టమవుతోంది. కేసీఆర్ స్వయంగా రంగంలోకి దిగితే తప్ప అసెంబ్లీలో కాంగ్రెస్ హవాకు అడ్డుకట్ట వేయడం కేటీఆర్ బృందానికి కష్టతరంగానే కనిపిస్తోంది.
