ముఖ్యమంత్రి చంద్రబాబు నాయుడు తన మనవడు దేవాన్ష్ పుట్టినరోజును పురస్కరించుకుని కుటుంబ సమేతంగా తిరుమల శ్రీవారిని దర్శించుకున్నారు. ఈ పర్యటనలో ఆయన సతీమణి భువనేశ్వరి, కుమారుడు మంత్రి నారా లోకేశ్తో కలిసి స్వామివారి ఆశీస్సులు అందుకున్నారు. దర్శనం అనంతరం కుటుంబ సభ్యులందరూ కలిసి కాలినడకన మాడ వీధుల గుండా ప్రయాణిస్తూ, దారిపొడవునా ఉన్న భక్తులకు అభివాదం చేస్తూ ముందుకు సాగారు.
ఈ సందర్భంగా ఒక సామాన్యుడిలా భక్తుల మధ్యకు వెళ్లిన ముఖ్యమంత్రి, తన భద్రతా సిబ్బందిని పక్కకు జరిపి మరీ ప్రజలతో కరచాలనం చేశారు. మనవడు దేవాన్ష్తో కలిసి భక్తులకు ఫోటోలు ఇచ్చారు, భక్తులు కూడా చిన్నారికి జన్మదిన శుభాకాంక్షలు తెలియజేస్తూ ఆనందం వ్యక్తం చేశారు. అనంతరం మాతృశ్రీ తరిగొండ వెంగమాంబ అన్నదాన సత్రానికి చేరుకుని, అక్కడ భక్తులకు స్వయంగా అన్నప్రసాదాన్ని వడ్డించి సేవా కార్యక్రమాల్లో పాలుపంచుకున్నారు.
ముఖ్యమంత్రి మరియు మంత్రి లోకేశ్ స్వయంగా వడ్డన సేవలో పాల్గొనడం తిరుమలకు వచ్చిన భక్తులను విశేషంగా ఆకట్టుకుంది. కుటుంబ సమేతంగా స్వామివారి సేవలోనూ, ప్రజా సేవలోనూ పాల్గొనడం పట్ల పలువురు ప్రశంసలు కురిపించారు. దేవాన్ష్ పుట్టినరోజును ఇలా ఆధ్యాత్మికంగా, సేవా దృక్పథంతో జరుపుకోవడం ఈ పర్యటనలో హైలైట్గా నిలిచింది.
