ఏపీ ఉపముఖ్యమంత్రి, పవర్ స్టార్ పవన్ కల్యాణ్ అంతర్జాతీయ స్థాయిలో అత్యంత అరుదైన ఘనతను సొంతం చేసుకున్నారు. ప్రాచీన జపనీస్ కత్తిసాము కళ అయిన ‘కెంజుట్సు’లో ఆయనకు అధికారిక ప్రవేశం లభించింది. మూడు దశాబ్దాలుగా ఆయన యుద్ధ కళల పట్ల కనబరుస్తున్న అంకితభావం, నిరంతర సాధనను గుర్తిస్తూ అంతర్జాతీయ మార్షల్ ఆర్ట్స్ సంస్థలు ఈ చారిత్రాత్మక గౌరవాన్ని ప్రకటించాయి. జపాన్ వెలుపల ‘టకెడా షింగెన్ క్లాన్’లో సభ్యత్వం పొందిన తొలి తెలుగు వ్యక్తిగా పవన్ కల్యాణ్ సరికొత్త రికార్డు సృష్టించారు.
పవన్ కల్యాణ్ మార్షల్ ఆర్ట్స్ ప్రయాణం ఆయన సినీ కెరీర్ కంటే ముందే ప్రారంభమైంది. కేవలం శారీరక వ్యాయామం కోసమే కాకుండా, యుద్ధ కళల వెనుక ఉన్న తత్వశాస్త్రాన్ని, జపనీస్ సమురాయ్ సంప్రదాయాలను ఆయన లోతుగా అధ్యయనం చేశారు. ‘అక్కడ అమ్మాయి ఇక్కడ అబ్బాయి’ నుంచి రాబోయే ‘OG’ వరకు తన అనేక చిత్రాల్లో ఈ యుద్ధ విద్యలను ప్రదర్శిస్తూ, భారతీయ యువతకు వీటిపై ఆసక్తి కలిగేలా చేశారు. ఆయన ప్రతిభను గుర్తించిన ‘సోగో బుడో కన్రి కై’ సంస్థ ప్రతిష్ఠాత్మక ‘ఫిఫ్త్ డాన్’ (5th Dan) పురస్కారాన్ని అందజేయగా, గోల్డెన్ డ్రాగన్స్ సంస్థ ‘టైగర్ ఆఫ్ మార్షల్ ఆర్ట్స్’ అనే బిరుదుతో సత్కరించింది.
భారతదేశంలోని ప్రముఖ బుడో నిపుణుడు హాన్షి ప్రొఫెసర్ డాక్టర్ సిద్ధిక్ మహ్మూదీ వద్ద పవన్ కల్యాణ్ ‘కెండో’లో ఉన్నత స్థాయి శిక్షణ పొందారు. సినిమా, శాస్త్రీయ యుద్ధ కళలు, యుద్ధ తత్వశాస్త్రం వంటి విభిన్న రంగాలను అంతర్జాతీయ వేదికపై సమన్వయం చేసిన అతికొద్ది మంది భారతీయుల్లో ఒకరిగా ఆయన నిలిచారు. రాజకీయాల్లో ప్రజా నాయకుడిగా రాణిస్తూనే, మరోవైపు యుద్ధ కళల్లో ఇటువంటి అరుదైన మైలురాళ్లను అధిగమించడం పట్ల ఆయన అభిమానులు మరియు క్రీడాకారులు హర్షం వ్యక్తం చేస్తున్నారు.
