కొత్త సంవత్సర వేడుకల వేళ హైదరాబాద్ యువతకు సీపీ సజ్జనార్ కీలక సూచనలు చేశారు. ముఖ్యంగా అర్ధరాత్రి వేళ డ్రంక్ అండ్ డ్రైవ్ తనిఖీల్లో పోలీసులతో వాగ్వాదానికి దిగి, లేనిపోని చట్టాలను వల్లించే ‘అతి తెలివి’ మేధావులను లక్ష్యంగా చేసుకుని ఆయన సోషల్ మీడియా వేదికగా సెటైర్లు వేశారు. మద్యం మత్తులో ఊహాజనిత సెక్షన్లు (సెక్షన్ 123, 567 వంటివి) చెబుతూ పోలీసులను బురిడీ కొట్టించాలనుకుంటే, ఆ ప్రయత్నాలు మిమ్మల్ని నవ్వుల పాలు చేస్తాయని, అలాంటి వారు స్టాండప్ కామెడీకో లేదా ఫిక్షన్ రైటింగ్ కో పనికొస్తారని ఆయన ఎద్దేవా చేశారు.
డ్రంక్ అండ్ డ్రైవ్లో పట్టుబడి పోలీసులపై చిందులు తొక్కేవారి పరిస్థితి మరుసటి రోజు ఎలా ఉంటుందో పోలీసులు కళ్లకు కట్టారు. ఆ సమయంలో మీరు చేసే రచ్చ అంతా వీడియో తీసి సోషల్ మీడియాలో ఉంచడం వల్ల, అది మీ ఫ్యామిలీ వాట్సాప్ గ్రూపులు మరియు ఇన్స్టాగ్రామ్లలో ఒక ‘మ్యూజియం’ లా నిలిచిపోతుందని హెచ్చరించారు. ఆ క్షణికావేశంలో చూపించే అహంకారం వల్ల జీవితాంతం పరువు పోవడం ఖాయమని, కోర్టులో అసలు లాయర్లు నిజమైన సెక్షన్లు చదివి వినిపిస్తుంటే మీ ‘లీగల్ మేధస్సు’ కుప్పకూలిపోతుందని స్పష్టం చేశారు.
హైదరాబాద్ పోలీసులు డ్రంక్ అండ్ డ్రైవ్ విషయంలో ‘సున్నా సహనం’ (Zero Tolerance) పాటిస్తారని సజ్జనార్ తేల్చి చెప్పారు. తాగి స్టీరింగ్ పట్టుకుని రోడ్లపైకి వస్తే ఎట్టి పరిస్థితుల్లోనూ ఉపేక్షించేది లేదని, మీ ప్రియమైన వాహనం డిటెన్షన్ సెంటర్లో బూట్ క్యాంప్ శిక్షణ పొందాల్సి వస్తుందని వ్యంగ్యంగా వ్యాఖ్యానించారు. బాధ్యతాయుతంగా వేడుకలు జరుపుకోవాలని, ఇతరుల భద్రతకు విఘాతం కలిగిస్తే చట్టపరమైన చర్యలు తప్పవని ఆయన ముగించారు.
