ఆరుగురు ఉద్యోగులకు కార్ల బహుమతి: చండీగఢ్ వ్యాపారి భాటియా మరో ఉదార నిర్ణయం!

చండీగఢ్‌ కేంద్రంగా పనిచేస్తున్న ‘మిట్స్ నేచురా లిమిటెడ్’ (Mits Natura Limited) ఔషధ తయారీ సంస్థ అధినేత ఎం.కే. భాటియా తన సంస్థలో పనిచేసే ఆరుగురు సిబ్బందికి కొత్త కార్లను బహుమతిగా అందజేశారు. కొద్ది కాలం క్రితమే దీపావళి సందర్భంగా 51 మంది ఉద్యోగులకు కార్లను గిఫ్ట్‌గా ఇచ్చి దేశవ్యాప్తంగా సంచలనం సృష్టించిన ఆయన, ఇప్పుడు క్రిస్మస్ మరియు కొత్త ఏడాది వేళ మరో ఆరుగురికి ఈ సర్‌ప్రైజ్ ఇచ్చారు.

తమ రంగంలో అత్యుత్తమ ప్రదర్శన కనబరిచిన వారిని భాటియా ‘ధురంధర్’ (నిపుణులు) అని సంబోధించారు. ఈ సందర్భంగా ఆయన మాట్లాడుతూ.. ప్రతి ఉద్యోగి నిరంతర అభ్యాసం, ఆత్మవిశ్వాసం మరియు నిజాయితీతో పనిచేస్తే విజయాలు వాటంతట అవే వస్తాయని పేర్కొన్నారు. కేవలం వ్యాపార వృద్ధి మాత్రమే కాకుండా, సమాజానికి మంచి సందేశం ఇవ్వడం, తమ సంస్థను ఒక కుటుంబంలా చూసుకోవడమే తన లక్ష్యమని ఆయన స్పష్టం చేశారు.

 ఎం.కే. భాటియా గురించి ఆసక్తికర విషయాలు:

• వరుసగా మూడేళ్లు: ఉద్యోగులకు కార్లను బహుమతిగా ఇవ్వడం భాటియాకు ఇది వరుసగా మూడో ఏడాది. గతేడాది 15 మందికి, అంతకుముందు ఏడాది 12 మందికి కార్లు ఇచ్చారు.

• స్ఫూర్తిదాయక ప్రస్థానం: 2002లో తన మెడికల్ స్టోర్ నష్టపోయి దివాలా తీసిన స్థితి నుంచి, నేడు 12 కంపెనీలకు అధిపతిగా ఎదిగిన భాటియా ప్రస్థానం ఎంతో మందికి స్ఫూర్తినిస్తోంది.

• సిబ్బందిపై గౌరవం: తన సంస్థలోని ఉద్యోగులను ఆయన కేవలం పనివారుగా కాకుండా ‘సహోద్యోగులు’ మరియు ‘రాక్‌స్టార్‌ సెలబ్రిటీలు’ అని పిలుస్తారు.