తెలంగాణలో స్థానిక సంస్థల ఎన్నికల నిర్వహణ కోసం రాష్ట్ర ప్రభుత్వం నవంబర్ 22న జారీ చేసిన జీవో నెం.46 ప్రస్తుతం రాష్ట్రవ్యాప్తంగా చర్చనీయాంశంగా మారింది. ఈ ప్రభుత్వ ఉత్తర్వు ప్రకారం, స్థానిక సంస్థల్లో ఎస్సీ, ఎస్టీ, బీసీ వర్గాలకు కలిపే రిజర్వేషన్లు మొత్తం 50% కంటే ఎక్కువ కాకూడదని ప్రభుత్వం స్పష్టం చేసింది.
ఈ జీవో వల్ల బీసీలకు కేవలం 22% రిజర్వేషన్ మాత్రమే లభించే అవకాశం ఉందని బీసీ సంఘాలు తీవ్ర ఆందోళన వ్యక్తం చేస్తున్నాయి. రాష్ట్రంలో బీసీలకు ఇంత తక్కువ రిజర్వేషన్లు కేటాయించడంపై అభ్యంతరాలు వ్యక్తం చేస్తూ, ఈ ఉత్తర్వును వ్యతిరేకిస్తూ అనేక పిటిషన్లు తెలంగాణ హైకోర్టులో దాఖలయ్యాయి.
ఈ జీవో 46 చుట్టూ ముదిరిన వివాదంపై తెలంగాణ హైకోర్టు రేపు (నవంబర్ 28) విచారణ జరపనుంది. జీవో చట్టబద్ధత, రిజర్వేషన్ల శాతంపై కోర్టు తీర్పు వెలువడే అవకాశం ఉండటంతో, స్థానిక సంస్థల ఎన్నికల భవిష్యత్తుపై ఈ విచారణ కీలకంగా మారింది.
