భారతీయ రైల్వేలో ఓ వ్యక్తి రైలు బాత్రూమ్ను తన తాత్కాలిక బెడ్రూమ్గా మార్చుకున్న వీడియో సోషల్ మీడియాలో వైరల్ అవుతోంది. దీపావళి సమయంలో రైళ్లలో అధిక రద్దీ ఉన్న కారణంగా, ఆ ప్రయాణికుడు బాత్రూమ్ తలుపు లోపల నుంచి తాళం వేసి, తన సామాను అంతా అక్కడే పెట్టుకుని, ఆ చిన్న ప్రదేశాన్ని ఒక ప్రైవేట్ కూపేలా ఉపయోగించుకున్నాడు. విండో బయటకు ఒక మడత మంచం కూడా పెట్టుకుని సేద తీరుతున్న ఈ దృశ్యం నెటిజన్లను ఆశ్చర్యానికి గురి చేసింది.
ఈ వీడియో సోషల్ మీడియాలో మిశ్రమ స్పందనలు పొందింది. కొంతమంది నెటిజన్లు ఆ ప్రయాణికుడి ‘ట్రావెల్ స్టైల్’ను వ్యంగ్యంగా పొగిడితే, మరికొందరు మాత్రం ప్రజా ఆస్తి దుర్వినియోగం అని, రైల్వే పరిశుభ్రతకు భంగం కలిగిస్తున్నారని విమర్శించారు. “ఇండియా ఇజ్ నాట్ ఫర్ బిగినర్స్” అంటూ కొందరు కామెంట్లు చేయగా, ఇలాంటి వారిని జైలులో వేయాలని మరికొందరు ఆగ్రహం వ్యక్తం చేశారు.
ప్రయాణికులు కూర్చునే స్థలం దొరకక ఇబ్బందులు పడుతుండగా, ఒక వ్యక్తి బాత్రూమ్ను ఆక్రమించుకోవడం రైల్వే వ్యవస్థలోని క్రమశిక్షణా లోపాన్ని స్పష్టంగా చూపిస్తుందని విమర్శకులు అంటున్నారు. ఈ ఘటనపై విమర్శలు వెల్లువెత్తుతున్నప్పటికీ, భారతీయ రైల్వే అధికారులు ఇప్పటివరకు ఎటువంటి అధికారిక స్పందన ఇవ్వలేదు.
