2023లో ప్రపంచంలోనే అత్యంత కలుషితమైన రాజధాని నగరం ఢిల్లీ అని స్విస్కు చెందిన ఎయిర్ క్వాలిటీ మానిటరింగ్ గ్రూప్ కనుగొంది.
ఢిల్లీ రాజధానిగా ఉన్న భారతదేశం, పొరుగున ఉన్న బంగ్లాదేశ్, పాకిస్తాన్ తర్వాత ప్రపంచంలోని మూడవ అత్యంత కాలుష్య దేశంగా ర్యాంక్ పొందిందని IQAir తెలిపింది.
2022 నుంచి దేశంలో గాలి నాణ్యత మరింత దిగజారింది. ఇది ఎనిమిదో అత్యంత కలుషితమైన దేశంగా ఉంది.
అనేక భారతీయ నగరాల్లో వాయు కాలుష్యం ఒక తీవ్రమైన సమస్య.
వేగవంతమైన పారిశ్రామికీకరణతో పాటు పర్యావరణ చట్టాల బలహీనమైన అమలు దేశంలో కాలుష్యాన్ని పెంచడంలో పాత్ర పోషిస్తుందని నిపుణులు అంటున్నారు.
భారతదేశం గత కొన్ని దశాబ్దాలుగా చాలా అభివృద్ధిని చూసింది. కానీ పారిశ్రామిక నియంత్రణ సరిగా లేకపోవడం వల్ల ఫ్యాక్టరీలు కాలుష్య-నియంత్రణ చర్యలను పాటించడం లేదు. వేగవంతమైన నిర్మాణం కూడా కాలుష్య స్థాయిలు పెరగడానికి దోహదపడింది.
IQAir నివేదిక ప్రకారం, భారతదేశ సగటు స్థాయి PM2.5 – ఊపిరితిత్తులు మూసుకుపోయే అనేక వ్యాధులకు కారణమయ్యే సూక్ష్మ రేణువుల పదార్థం – క్యూబిక్ మీటరుకు 54.4 మైక్రోగ్రాములు.
ప్రపంచవ్యాప్తంగా, క్యూబిక్ మీటరుకు PM2.5 12 నుంచి 15 మైక్రోగ్రాముల గాలి పీల్చడం సురక్షితంగా పరిగణిస్తారు. అయితే క్యూబిక్ మీటరుకు 35 మైక్రోగ్రాముల కంటే ఎక్కువ విలువలు ఉన్న గాలి అనారోగ్యకరమైనదిగా పరిగణించబడుతుంది.
ఢిల్లీ గాలి నాణ్యత.. భారతదేశం మొత్తం గాలి నాణ్యత కంటే అధ్వాన్నంగా ఉంది, క్యూబిక్ మీటరుకు 92.7 మైక్రోగ్రాముల PM2.5 రీడింగ్ను కలిగి ఉంది.
ఢిల్లీ ఏడాది పొడవునా చెడు గాలితో పోరాడుతుంది. అయితే శీతాకాలంలో గాలి ముఖ్యంగా విషపూరితంగా మారుతుంది.
సమీప రాష్ట్రాల్లోని రైతులు పంట అవశేషాలను తగలబెట్టడం, పారిశ్రామిక, వాహనాల ఉద్గారాలు, తక్కువ గాలి వేగం, పండుగల సమయంలో పటాకులు పేల్చడం వంటి అనేక కారణాల వల్ల ఇది జరుగుతుంది.
గత సంవత్సరం, విషపూరితమైన గాలి కారణంగా ప్రభుత్వం పాఠశాలలు, కళాశాలలను వరుసగా చాలా రోజులు మూసివేసింది.
అదే సమయంలో, ఉత్తర భారత నగరం బెగుసెరాయ్, ఈశాన్య నగరం గౌహతి ప్రపంచంలోని రెండు అత్యంత కాలుష్య నగరాలుగా ర్యాంక్ పొందాయి.
కేవలం ఏడు దేశాలు మాత్రమే ప్రపంచ ఆరోగ్య సంస్థ (WHO) వార్షిక PM2.5 మార్గదర్శకానికి అనుగుణంగా ఉన్నాయి, ఇది క్యూబిక్ మీటరుకు వార్షిక సగటు 5 మైక్రోగ్రాములు లేదా అంతకంటే తక్కువ.
వీటిలో ఆస్ట్రేలియా, న్యూజిలాండ్, ఐస్లాండ్, ఫిన్లాండ్ ఉన్నాయి.
