తెలంగాణ మున్సిపల్ మరియు కార్పొరేషన్ ఎన్నికల ఫలితాల్లో జనసేన పార్టీ తన ఉనికిని చాటుకుంటూ రెండు వార్డుల్లో ఘన విజయం సాధించింది. మంచిర్యాల కార్పొరేషన్ 34వ డివిజన్ నుండి జనసేన అభ్యర్థి అగ్గు సాగర్ 31 ఓట్ల మెజార్టీతో విజయం సాధించగా, సూర్యాపేట జిల్లా నేరేడుచర్ల మున్సిపాలిటీ 14వ వార్డులో ఆరూరి విజయలక్ష్మి 29 ఓట్ల మెజార్టీతో గెలుపొందారు. ఈ మేరకు హైదరాబాద్లోని పార్టీ కార్యాలయంలో మీడియా సమావేశం నిర్వహించిన రాష్ట్ర ఉపాధ్యక్షుడు బొంగునూరి మహేందర్ రెడ్డి, అభ్యర్థుల గెలుపునకు సహకరించిన ఓటర్లకు మరియు కష్టపడిన వీర మహిళలు, జనసైనికులకు పవన్ కల్యాణ్ తరఫున కృతజ్ఞతలు తెలిపారు.
తెలంగాణలో ఈసారి మున్సిపల్ ఎన్నికల బరిలో జనసేన తరఫున 330 మందికి పైగా అభ్యర్థులు పోటీ చేయడం విశేషం. అతి తక్కువ సమయంలోనే పార్టీ సిద్ధాంతాలను ప్రజల్లోకి తీసుకెళ్లి, రెండు చోట్ల విజయం సాధించడం ద్వారా రాష్ట్రంలో పార్టీ ప్రస్థానానికి గట్టి పునాది పడిందని నాయకులు అభిప్రాయపడ్డారు. పార్టీ ఇన్ఛార్జ్ నేమూరి శంకర్ గౌడ్ మాట్లాడుతూ, ఈ గెలుపు పార్టీ శ్రేణుల్లో కొత్త ఉత్సాహాన్ని నింపిందని, పవన్ కల్యాణ్ ఆశయాలను గ్రామస్థాయిలోకి మరింత బలంగా తీసుకెళ్తామని స్పష్టం చేశారు.
మున్సిపల్ ఎన్నికల స్ఫూర్తితో రాబోయే జీహెచ్ఎంసీ (GHMC) ఎన్నికల్లో పూర్తిస్థాయిలో పోటీ చేస్తామని జనసేన నాయకత్వం ప్రకటించింది. గెలుపే లక్ష్యంగా హైదరాబాద్ నగర వ్యాప్తంగా పార్టీని బలోపేతం చేస్తామని రాజలింగం, ఆర్కే సాగర్ మరియు ప్రేమ్ కుమార్ వంటి నేతలు ధీమా వ్యక్తం చేశారు. తెలంగాణ ఉద్యమ స్ఫూర్తితో ఏర్పడిన పార్టీగా, ఇక్కడి ప్రజల సమస్యలపై నిరంతరం పోరాడుతూ భవిష్యత్తులో మరిన్ని విజయాలు సాధిస్తామని వారు పిలుపునిచ్చారు.
