తెలంగాణవ్యాప్తంగా రేపు (ఫిబ్రవరి 11) జరగనున్న మున్సిపల్ ఎన్నికల పోలింగ్కు పోలీస్ శాఖ భారీ భద్రతా ఏర్పాట్లు పూర్తి చేసింది. శాంతిభద్రతల పరిరక్షణ కోసం రాష్ట్రవ్యాప్తంగా 181 ఫ్లైయింగ్ స్క్వాడ్స్, 55 అంతర్రాష్ట్ర చెక్ పోస్టులను ఏర్పాటు చేసినట్లు డీజీపీ వెల్లడించారు. గడిచిన 15 రోజుల్లోనే తనిఖీలు ముమ్మరం చేసి నిబంధనలకు విరుద్ధంగా తరలిస్తున్న 3 కోట్ల రూపాయలకు పైగా నగదు, మద్యం మరియు డ్రగ్స్ను స్వాధీనం చేసుకున్నారు. అలాగే, భద్రతలో భాగంగా సుమారు 2,950 మంది రౌడీ షీటర్లను ముందస్తుగా బైండోవర్ చేశారు.
రాష్ట్రవ్యాప్తంగా ఉన్న 8,203 పోలింగ్ కేంద్రాలను పోలీసులు మూడు వర్గాలుగా విభజించారు. అందులో 1,302 కేంద్రాలను అత్యంత సమస్యాత్మకమైనవిగా (Critical), 1,926 కేంద్రాలను సమస్యాత్మకమైనవిగా గుర్తించి అక్కడ అదనపు బలగాలను మోహరించారు. ఈసారి ప్రత్యేకంగా సమస్యాత్మక కేంద్రాల వద్ద బూత్ లోపలే కాకుండా, బయట కూడా ‘వెబ్ కాస్టింగ్’ ద్వారా నిఘా ఉంచాలని ఎన్నికల కమిషన్ నిర్ణయించింది. రాష్ట్రవ్యాప్తంగా 100కు పైగా కేంద్రాల్లో ప్రత్యేక వెబ్ కాస్టింగ్ పర్యవేక్షణ కొనసాగనుంది.
మొత్తం 2,996 వార్డుల్లో జరిగే ఈ ఎన్నికల్లో సుమారు 52.43 లక్షల మంది ఓటర్లు తమ ఓటు హక్కును వినియోగించుకోనున్నారు. ఓటర్లు ఎటువంటి భయం లేకుండా స్వేచ్ఛగా ఓటు వేయాలని, పోలింగ్ ముగిసిన వెంటనే బ్యాలెట్ బాక్సులను కట్టుదిట్టమైన భద్రతతో 136 కౌంటింగ్ సెంటర్లకు తరలిస్తామని అధికారులు తెలిపారు. సరిహద్దు రాష్ట్రాలైన మహారాష్ట్ర, కర్ణాటక సరిహద్దుల్లో కూడా నిఘా పెంచడం ద్వారా ఇతర ప్రాంతాల వ్యక్తులు వచ్చి అల్లర్లు సృష్టించకుండా ముందస్తు చర్యలు చేపట్టారు.
