ఒకప్పుడు తెలుగు చిత్ర పరిశ్రమలో ‘ఇప్పటికింకా నా వయసు నిండా పదహారే’ అంటూ కుర్రకారును ఊపేసిన ముమైత్ ఖాన్, గత కొంతకాలంగా వెండితెరకు దూరంగా ఉంటున్నారు. దీనికి గల కారణాన్ని ఆమె తాజా ఇంటర్వ్యూలో వెల్లడించారు. ఒక ప్రమాదం తన జీవితాన్ని పూర్తిగా తలకిందులు చేసిందని, ఆ ఘటనలో తన మెదడులోని నరాలకు తీవ్రమైన దెబ్బ తగిలిందని ఆమె తెలిపారు. ఆ ప్రభావంతో దాదాపు ఏడేళ్ల పాటు తను మంచానికే పరిమితం కావాల్సి వచ్చిందని పేర్కొన్నారు.
ఈ ఆరోగ్య సమస్యల కారణంగా తను ప్రాణాపాయ స్థితిని కూడా చూశానని, డ్యాన్స్కు పూర్తిగా దూరమవ్వడం తనను ఎంతో కృంగదీసిందని ముమైత్ వివరించారు. కోలుకునే ప్రక్రియలో భాగంగా వాడిన మందుల వల్ల శరీరం లావుగా మారిందని, ఆ సమయంలో తన రూపాన్ని చూసి తనకే ఆశ్చర్యం కలిగిందని ఆమె చెప్పారు. కెరీర్ పీక్ స్టేజ్లో ఉన్నప్పుడు ఇలా జరగడం తన వ్యక్తిగత మరియు వృత్తిగత జీవితంపై తీవ్ర ప్రభావం చూపిందని ఆమె ఆవేదన వ్యక్తం చేశారు.
అయితే, ఆ కఠిన పరిస్థితుల్లో తన తల్లి తనకు అండగా నిలిచారని, ఆమె కంటికి రెప్పలా చూసుకోవడం వల్లే తాను మళ్లీ కోలుకోగలిగానని ముమైత్ కృతజ్ఞతతో చెప్పుకొచ్చారు. ప్రస్తుతం ఆరోగ్యం కుదుటపడటంతో ఆమె మళ్లీ సెకండ్ ఇన్నింగ్స్ ప్రారంభించే దిశగా అడుగులు వేస్తున్నారు. టాలీవుడ్లో ఒక వెలుగు వెలిగిన స్టార్ డ్యాన్సర్ జీవితంలో ఇంతటి విషాదం దాగి ఉందన్న విషయం తెలిసి అభిమానులు షాక్కు గురవుతున్నారు.
