కర్ణాటకకు చెందిన 1993 బ్యాచ్ సీనియర్ ఐపీఎస్ అధికారి, డీజీపీ ర్యాంక్ అధికారి రామచంద్రరావు తీవ్ర వివాదంలో చిక్కుకున్నారు. ఆయన తన కార్యాలయంలోనే పలువురు మహిళలతో సన్నిహితంగా, అనుచితంగా ప్రవర్తించినట్లు ఉన్న ఒక వీడియో సోషల్ మీడియాలో విపరీతంగా వైరల్ అవుతోంది. డీజీపీ హోదాలో ఉండి, ఆఫీసులోనే ఇలాంటి చర్యలకు పాల్పడటంపై సర్వత్రా విమర్శలు వ్యక్తమవుతున్నాయి. ఈ ఉదంతంపై ముఖ్యమంత్రి సిద్ధరామయ్య తీవ్రంగా స్పందించారు. తక్షణమే ఈ వ్యవహారంపై సమగ్ర విచారణ జరిపి నివేదిక సమర్పించాలని ఉన్నతాధికారులను ఆదేశించారు.
ఈ ఆరోపణలపై డీజీపీ రామచంద్రరావు స్పందిస్తూ ఆ వీడియోలను ఖండించారు. అవి ఫేక్ వీడియోలని, తన ప్రతిష్టను దెబ్బతీయడానికి ఎవరో మార్ఫింగ్ చేశారని ఆయన వాదిస్తున్నారు. తనను పదవి నుంచి తొలగించేందుకు కొంతమంది ఉన్నతాధికారులు పన్నిన కుట్రలో భాగంగానే ఈ వీడియోలను సృష్టించారని ఆయన ఆరోపించారు. అయితే, డీజీపీ ఆఫీసులో పనిచేసే సిబ్బందే ఈ దృశ్యాలను రహస్యంగా చిత్రీకరించినట్లు సమాచారం రావడంతో విచారణ కీలకంగా మారింది. ఒకవేళ వీడియోలో ఉన్నది నిజమని తేలితే ఆయనపై కఠిన చర్యలు తీసుకుంటామని ప్రభుత్వం స్పష్టం చేసింది.
మరో విశేషమేమిటంటే, రామచంద్రరావు కుమార్తె, కన్నడ నటి రన్యారావు గతంలో గోల్డ్ స్మగ్లింగ్ కేసులో అరెస్ట్ అయ్యారు. తన తండ్రి హోదాను ఉపయోగించుకుని ఆమె విమానాశ్రయాల్లో తనిఖీల నుంచి తప్పించుకున్నారనే ఆరోపణలు అప్పట్లో సంచలనం సృష్టించాయి. ఇప్పుడు స్వయంగా తండ్రిపైనే ఇటువంటి ఆరోపణలు రావడం పోలీసు శాఖలో చర్చనీయాంశమైంది. విధి నిర్వహణలో ఉండి నిబంధనలు ఉల్లంఘించినట్లు తేలితే రామచంద్రరావు తన పదవిని కోల్పోయే అవకాశం ఉందని విశ్లేషకులు భావిస్తున్నారు
