కాంగ్రెస్ పార్టీ సీనియర్ నేత జగ్గారెడ్డి, వృద్ధులకు రూ.4,000 పెన్షన్, మహిళలకు రూ.2,500 ఆర్థిక సాయం వంటి ఎన్నికల హామీల అమలుపై కీలక వ్యాఖ్యలు చేశారు. జూబ్లీహిల్స్ ఉపఎన్నికల ప్రచారంలో పాల్గొన్న ఆయన, ఈ పథకాలను త్వరలోనే అమలు చేస్తామని ఓటర్లకు హామీ ఇచ్చారు. ఈ హామీల అమలుకు సీఎం రేవంత్ రెడ్డి ఆలోచన చేస్తున్నారని, త్వరలోనే ఒక ముహూర్తం ఖరారు కానుందని ఆయన తెలిపారు. ముఖ్యమంత్రి రేవంత్ రెడ్డి వాగ్దానాల అమలుకు బడ్జెట్ సమకూర్చుకునే కార్యక్రమంలో ఉన్నారని, దీనిపై ఎలాంటి అనుమానం లేదని జగ్గారెడ్డి స్పష్టం చేశారు.
సంక్షేమ పథకాల అమలు గురించి సోషల్ మీడియాలో వస్తున్న ప్రశ్నలపై స్పందించిన జగ్గారెడ్డి, కాంగ్రెస్ ప్రభుత్వం ఇప్పటికే ఒక్కో హామీని అమలు చేసుకుంటూ వస్తోందని అన్నారు. ప్రజలకు బడ్జెట్ పరిస్థితి గురించి తెలుసునని పేర్కొంటూ, “రెండేళ్లు అయిపోయాయి. ఇంకా మూడేళ్ల సమయం ఉంది. మిగిలిన పథకాలు అమలు చేసేందుకు సీఎం రేవంత్ ప్రయత్నం చేస్తున్నారు. కొంత ఓపిక పట్టండి. అవి కూడా అమలవుతాయి” అని ప్రజలకు విజ్ఞప్తి చేశారు. రాబోయే మూడు సంవత్సరాల్లో మిగిలిన హామీలను కూడా కచ్చితంగా నెరవేరుస్తామని ఆయన భరోసా ఇచ్చారు.
జూబ్లీహిల్స్ ఉపఎన్నిక సందర్భంగా ఆయన స్థానిక కాంగ్రెస్ అభ్యర్థి నవీన్ యాదవ్ గెలుపుపై దృష్టి పెట్టారు. అధికారంలో ఉన్న కాంగ్రెస్తోనే జూబ్లీహిల్స్ అభివృద్ధి సాధ్యమని, ముఖ్యమంత్రి ద్వారా నవీన్ యాదవ్ నియోజకవర్గ పనులను చేయించగలరని జగ్గారెడ్డి అన్నారు. ప్రతిపక్ష నేత గెలిస్తే అభివృద్ధికి అవకాశాలు తక్కువగా ఉంటాయని చెబుతూ, నవీన్ యాదవ్ను గెలిపిస్తే జూబ్లీహిల్స్ అభివృద్ధికి తాను కూడా బాధ్యత వహిస్తానని జగ్గారెడ్డి హామీ ఇచ్చారు.
