తమిళంలో స్టార్ హీరోగా మంచి గుర్తింపు తెచ్చుకున్నా, తెలుగులో కూడా మంచి క్రేజ్ ఉన్న హీరో విశాల్ (Vishal). విశాల్కి ‘యాక్షన్ హీరో’ అనే పేరు రావడానికి ముఖ్య కారణం… ఆయన తన సినిమాల్లో డూప్స్ను ఉపయోగించకుండా, అన్ని యాక్షన్ సీన్స్ను స్వయంగా చేయడమే. సాధారణంగా హీరోలు చిన్న ఫైట్స్ మాత్రమే సొంతంగా చేస్తారు, కానీ పెద్ద యాక్షన్ సీక్వెన్స్లకు లేదా భారీ స్టంట్లకు డూప్స్ను వాడడం కామన్.
అయితే, విశాల్ మాత్రం అందుకు భిన్నంగా ఎంతటి పెద్ద యాక్షన్ సీక్వెన్స్ అయినా, భారీ స్టంట్ అయినా రిస్క్ తీసుకుని పూర్తి చేస్తారు. డూప్స్ లేకుండా సినిమాల్లో నటించడం వల్లే, ఆయన శరీరానికి ఏకంగా 119 కుట్లు పడ్డాయట. ఈ విషయాన్ని విశాల్ స్వయంగా వెల్లడించారు. ఈ విషయం తెలుసుకున్న ఆడియన్స్, విశాల్ లాంటి అంకితభావం ఉన్న నటులు చాలా అరుదుగా ఉంటారని కామెంట్స్ చేస్తూ, ఆయనను ప్రశంసిస్తున్నారు.
కాగా, విశాల్ త్వరలోనే ‘యువర్స్ ఫ్రాంక్లీ విశాల్’ (Yours Frankly Vishal) పేరుతో ఓ పాడ్కాస్ట్ను ప్రారంభించనున్నారు. తాజాగా విడుదలైన దానికి సంబంధించిన ప్రోమోలో ఆయన ఈ విషయాన్ని బయటపెట్టారు. రీసెంట్గా ఇండస్ట్రీలోకి వచ్చి 21 ఏళ్లు పూర్తి చేసుకున్న విశాల్, త్వరలోనే నటి సాయి ధన్సిక (Sai Dhansika)ను పెళ్లాడనున్న సంగతి కూడా తెలిసిందే.
