ఆంధ్రప్రదేశ్ విద్య, ఐటీ శాఖల మంత్రి నారా లోకేష్ తన సొంత నియోజకవర్గమైన మంగళగిరిలో మరో కీలక ఎన్నికల హామీని నెరవేర్చారు. తాడేపల్లి మహానాడు ప్రాంత ప్రజల దశాబ్దాల కల అయిన రిటైనింగ్ వాల్ (వరద రక్షణ గోడ) నిర్మాణానికి సోమవారం ఆయన శంకుస్థాపన చేశారు. రూ.294.20 కోట్ల వ్యయంతో ప్రకాశం బ్యారేజీ దిగువన కృష్ణా నది కుడివైపున సుమారు 1.7 కిలోమీటర్ల మేర ఈ గోడను నిర్మించనున్నారు. కేవలం ఏడాది కాలంలోనే నిధుల మంజూరు నుండి టెండర్ ప్రక్రియ వరకు అన్ని పనులను పూర్తి చేసి లోకేష్ తన చిత్తశుద్ధిని చాటుకున్నారు.
ఈ రక్షణ గోడను అత్యంత ఆధునికమైన ‘పైల్-రాఫ్ట్’ సాంకేతికతతో నిర్మిస్తున్నారు. భవిష్యత్తులో వచ్చే భారీ వరదలను, సుమారు 15 లక్షల క్యూసెక్కుల నీటి ప్రవాహాన్ని తట్టుకునేలా దీని డిజైన్ను రూపొందించారు. భూమి లోపల 26 నుండి 38 మీటర్ల లోతు వరకు 1,920 పైల్స్ వేయడం ద్వారా భూకంపాలను సైతం తట్టుకునేలా ఈ నిర్మాణం సాగనుంది. ఈ ప్రాజెక్టు పూర్తయితే మహానాడు కాలనీ, సుందరయ్య నగర్ వంటి లోతట్టు ప్రాంతాల్లో నివసించే దాదాపు 50 వేల మంది ప్రజలకు వరద ముప్పు నుండి శాశ్వత విముక్తి లభిస్తుంది.
అమరావతి రాజధాని ప్రాంతంలోని కీలక ప్రదేశాలతో పాటు జాతీయ రహదారి-65కు కూడా ఈ గోడ రక్షణగా నిలవనుంది. శంకుస్థాపన అనంతరం ఏర్పాటు చేసిన సభలో లోకేష్ మాట్లాడుతూ, మంగళగిరి అభివృద్ధికి తాము కట్టుబడి ఉన్నామని స్పష్టం చేశారు. ఈ కార్యక్రమంలో గుంటూరు జిల్లా కలెక్టర్ ఏ.తమీమ్ అన్సారియాతో పాటు పలువురు టీడీపీ నేతలు, కార్పొరేషన్ ఛైర్మన్లు పాల్గొన్నారు. దశాబ్దాలుగా పెండింగ్లో ఉన్న సమస్య పరిష్కారం కావడంతో స్థానిక ప్రజలు హర్షం వ్యక్తం చేస్తున్నారు.
