ఆధునిక యుద్ధ స్వరూపం సమూలంగా మారిపోయిందని, చౌకగా, భారీ సంఖ్యలో ఉత్పత్తి అవుతున్న డ్రోన్లు ఇప్పుడు యుద్ధ క్షేత్రంలో నిర్ణయాత్మక శక్తిగా మారాయని అమెరికా రక్షణ శాఖ ప్రధాన కార్యాలయం పెంటగాన్ ఆందోళన వ్యక్తం చేసింది. ఉక్రెయిన్ యుద్ధం, ఇరాన్ ప్రమేయం ఉన్న ఇటీవలి ఘర్షణల నుంచి పాఠాలు నేర్చుకోవాల్సిన అవసరం ఉందని నొక్కి చెప్పింది. చైనాపై ఆధారపడటాన్ని తగ్గించుకుని, అమెరికా వేగంగా స్వదేశీ డ్రోన్ల పరిశ్రమను నిర్మించుకోవాలని, సైనిక దళాలను భారీ సంఖ్యలో మానవరహిత వ్యవస్థలతో సన్నద్ధం చేయాలని పెంటగాన్ ఉన్నతాధికారులు యూఎస్ చట్టసభ సభ్యులకు స్పష్టం చేశారు.
సెనేట్ ఆర్మ్డ్ సర్వీసెస్ కమిటీ ముందు హాజరైన పెంటగాన్ అధికారులు ఈ కీలక వ్యాఖ్యలు చేశారు. “గత కొన్ని తరాలుగా యుద్ధరంగంలో వచ్చిన అతిపెద్ద ఆవిష్కరణ డ్రోన్లే” అని పెంటగాన్ సీనియర్ సలహాదారు ఓవెన్ వెస్ట్ తెలిపారు. అమెరికా డ్రోన్ పారిశ్రామిక రంగాన్ని బలోపేతం చేసేందుకు మూడు ప్రధాన లక్ష్యాలను నిర్దేశించుకున్నట్లు ఆయన వివరించారు. అవి: దేశీయ తయారీ రంగాన్ని పటిష్ఠం చేయడం, సైనిక దళాలకు డ్రోన్లు అందించి శిక్షణనివ్వడం, సాంకేతికంగా ముందంజ వేయడం.
ఈ సందర్భంగా సెనేట్ కమిటీ ఛైర్మన్ రోజర్ వికెర్ మాట్లాడుతూ.. డ్రోన్ల మార్కెట్లో అమెరికా వెనుకబడిపోయిందని ఆందోళన వ్యక్తం చేశారు. “చైనా ప్రభుత్వం కొన్ని పదుల బిలియన్ల డాలర్ల సబ్సిడీలు, వ్యూహాత్మక ధరల విధానాలతో ప్రపంచ నాన్-మిలిటరీ డ్రోన్ మార్కెట్లో 90 శాతానికి పైగా వాటాను చేజిక్కించుకుంది. ఫలితంగా చైనా మోడళ్లతో పోలిస్తే అమెరికా డ్రోన్లు 5 నుంచి 25 రెట్లు ఖరీదైనవిగా మారాయి” అని ఆయన వివరించారు. యుద్ధ క్షేత్రంలో జరుగుతున్న మరణాల్లో సగానికి పైగా డ్రోన్ల దాడుల వల్లే సంభవిస్తున్నాయని మరో సభ్యుడు జాక్ రీడ్ అన్నారు.
ఈ నేపథ్యంలో ‘డ్రోన్ ఆధిపత్యం’ (డ్రోన్ డామినెన్స్) కార్యక్రమాన్ని ప్రారంభించినట్లు పెంటగాన్ వెల్లడించింది. ఈ కార్యక్రమం కింద రాబోయే 18 నెలల్లో డ్రోన్ల కొనుగోలుకు 1.1 బిలియన్ డాలర్లు కేటాయించినట్లు ప్రోగ్రామ్ మేనేజర్ ట్రావిస్ మెట్జ్ తెలిపారు. ఇటీవల 25 కంపెనీలతో నిర్వహించిన పోటీలో విజేతలకు 30,000 వన్-వే అటాక్ డ్రోన్ల తయారీకి ఆర్డర్లు ఇవ్వనున్నట్లు చెప్పారు. వీటిని రాబోయే ఐదు నెలల్లో సైనిక విభాగాలకు అందిస్తామన్నారు.
ఉక్రెయిన్ గత ఏడాది సుమారు 4.5 మిలియన్ల డ్రోన్లను ఉత్పత్తి చేసిందని, వాటిలో చాలావాటి ఖరీదు 500 డాలర్ల నుంచి కొన్ని వేల డాలర్ల లోపే ఉందని మెట్జ్ అంగీకరించారు. తాము కొనుగోలు చేసే డ్రోన్ల ధర ప్రస్తుతం 5,000 డాలర్లుగా ఉన్నప్పటికీ, ఉత్పత్తి పెరిగేకొద్దీ దాన్ని 2,000 డాలర్ల కంటే తక్కువకు తీసుకురావడమే లక్ష్యమని అధికారులు తెలిపారు. యుద్ధరంగంలో మారుతున్న అవసరాలకు అనుగుణంగా అమెరికా తన విధానాలను మార్చుకోవాల్సిన తక్షణ అవసరాన్ని ఈ పరిణామాలు స్పష్టం చేస్తున్నాయి.
