తెలంగాణ మున్సిపల్ ఎన్నికల పోలింగ్ సందర్భంగా కేంద్రమంత్రి మరియు బీజేపీ రాష్ట్ర అధ్యక్షుడు కిషన్ రెడ్డి ఓటర్లకు కీలక విజ్ఞప్తి చేశారు. రాష్ట్రంలోని మున్సిపాలిటీలు, కార్పొరేషన్లు సమగ్రంగా అభివృద్ధి చెందాలంటే బీజేపీ అభ్యర్థులను భారీ మెజారిటీతో గెలిపించాలని ఆయన కోరారు. ‘ఎక్స్’ (ట్విట్టర్) వేదికగా ఓటర్లను ఉద్దేశించి ప్రకటన విడుదల చేసిన ఆయన, ప్రధాని మోదీ నాయకత్వంలో పట్టణాల రూపురేఖలు మార్చేందుకు ప్రజలు కమలం గుర్తుకు ఓటు వేయాలని పిలుపునిచ్చారు.
గత 12 ఏళ్లుగా రాష్ట్రంలో పాలించిన బీఆర్ఎస్, కాంగ్రెస్ పార్టీలు మున్సిపాలిటీల అభివృద్ధిని పూర్తిగా విస్మరించాయని కిషన్ రెడ్డి విమర్శించారు. పట్టణాలు కనీసం వీధి లైట్లు, సరైన డ్రైనేజీ వ్యవస్థ వంటి కనీస సౌకర్యాలు లేక దుస్థితికి చేరుకున్నాయని ఆయన ఆవేదన వ్యక్తం చేశారు. ప్రజా సమస్యల పరిష్కారం కంటే ఓటు బ్యాంక్ రాజకీయాలకే ఆయా పార్టీల నేతలు ప్రాధాన్యం ఇచ్చారని, దీనివల్ల సామాన్య ప్రజలు నిత్యం ఇబ్బందులు పడుతున్నారని ఆయన పేర్కొన్నారు.
మున్సిపాలిటీల్లో పారదర్శకమైన పాలన మరియు నిధుల సద్వినియోగం కేవలం బీజేపీతోనే సాధ్యమని కిషన్ రెడ్డి స్పష్టం చేశారు. కేంద్ర ప్రభుత్వ పథకాలను పట్టణ స్థాయిలోకి సమర్థవంతంగా తీసుకెళ్లాలన్నా, మౌలిక సదుపాయాల కల్పన వేగవంతం కావాలన్నా బీజేపీ అభ్యర్థుల గెలుపు అవసరమని ఆయన అభిప్రాయపడ్డారు. పట్టణ ఓటర్లు ఆలోచించి, అభివృద్ధికి పట్టం కట్టాలని కిషన్ రెడ్డి తన ప్రకటనలో ఆశాభావం వ్యక్తం చేశారు.
